's Eseli
Ä Gschicht vom Wärde und Finde
Christiane Lauener

Dr Ma het gruefe ‘Eseli - chumm Eseli!’

Ds Eseli het gfouget, aber es het nid gwüsst, wär es isch, oder was es söu mache. Es isch ällei uf dr Wise gschtande.

Dört het ‘s meh als hundert Schääfli gha.

Aui hei zunere grosse Familie ghört,

aber ds Eseli isch aleini gsi.

 

Wenn dr Hung isch cho schnüffle,

Het ds Eseli sini Hingerbei id Luft gschlage:‘gang wägg’, het‘s dermit wöue säge,‘ig bruuche di nid’. Ds Ross het sii Hafer mit ihm wöue teile, aber im Schtall isch es am Eseli z’ äng gsi. Am liebschte het ärs gha, wenn dr Ma sini länge Ohre gchräbelet het. Mängisch het dr Ma gseit:

‘s chunnt guet – wirsch gseh’.

 

Schtundelang het ‘s de Schääfli uf em Fäud zueglueget  und sich gwünscht, derzue z’ ghöre. ‘Du chönntisch doch mit mir und em Hung cho d’ Schaaf hüete, ig chönnti dini Hiuf bruuche’, het dr Ma zum Eseli gseit. Ds Eseli isch unsicher gsi. Was chönnts scho für d’ Schaaf mache? Dr Hung isch cho schnüffle, und dr Ma het nomou gruefe: ‘Chumm Eseli’

ds Eseli het gfouget. Jede Tag isch es mit em Ma und em Hung uf ’s Fäud use zu de Schaaf.

 

Es het gleert, guet z’ luege und guet z’ lose. Mit dr Ziit het ‘s Eseli jedes einzelne Schaaf kennt und gwüsst, uf weles Schaaf es bsunders het müesse uufpasse. Ds Schääfli Baahrnabas isch sii Fründ worde. Dr Baahrnabas het ghumplet und het sich vom Eseli lo häufe, bim Uefeloufe uf e Hügu. Ds Eseli het mit sinere Chraft dr Baarnabas ufegschtosse.

So isch es cho, dass ds Eseli sini Uufgab gfunge g’ha het. Am Abe unter de vile Schtärne am Himmu het dr Ma gruefe ‘chumm Eseli’ und het ihm e chli ds Ohr gchräbelet.

 

Einisch i dr Nacht dusse uf em Fäud

isch ä Wouf cho und het es Schääfli wöue riisse. Sofort het ds Eseli die Gfahr erchennt und isch mit voller Wucht und mit ganz luutem iiii-aaa uf e Wouf loos.

Es isch grösser und schtärcher gsi als dr Wouf und so het dr Wouf wider müesse dervozieh. ‘Das hesch du guet gmacht Eseli’, het dr Ma gmeint, ‘ig bi froh, hüetesch du mini Schaaf –

ou wenn die andere lache, wöu du jo kei richtige Schaafhung bisch, aber mit dir si d’ Schaaf sicher’ und er hets am Ohr gchräbelet.

 

Ds Eseli het gschpürt, wenn ’s amene Schaaf nid guet gange isch. Mängisch het‘s dr Ma gruefe, wenn es Schaaf bockig to het. Ds Eseli isch denn ganz schtiu näbe ds Schaaf ane gschtange, bis es wider ruhig worde isch. Und einisch isch dr Baahrnabas verschwunde, und ds Eseli isch ne go sueche. Imene Zuun het dr Baahrnabas sich verfange; ds Eseli het mit siim Huuf dr Zuun ufgrisse und dr Baahrnabas befreit. Zäme si si zrugg zu dr Härde glofe. ‘Das hesch du guet gmacht, Eseli, het der Ma gmeint

und het‘s am Ohr gchräbelet.

 

Amene bsundere Tag isch dr Ma mit em Eseli i die grossi Stadt uf e Märit gange.

Bi dr Stadtmuur het ‘s Eseli a dr Tür aabunde gwartet und het die vile Mönsche beobachtet. Ir Stadt isch es gar luut gsi, und es het langi Ziit nach de Schaaf gha.

Dr Ma isch mit emene frömde Ma zrugg cho und het em Eseli guet zugredt:
‘dä Frömdi heisst Jesus und bruucht dini Hiuf’. Ds Eseli het sofort Vertroue i dä Jesus gha und isch mitgange. Dr Jesus het vili Dechine uf e Rügge vom Eseli gleit

und isch uf ihm gritte – das het vorhär no niemer gmacht. Zerscht isch es e chli ängschtlich gsi, aber dr Jesus het ‘s a de Ohre gchräbelet und gchüschelet ‘das machsch du guet’.

 

Mit neuem Vertroue isch ds Eseli voragschritte. Die vile Lüüt i dr Stadt hei immer wider ‘Hosanna’ gruefe. Über ganz vili Bletter isch ds Eseli gloffe und dr Jesus het ‘s immer wieder am Ohr gchräbelet: ‘Das hesch du guet gmacht’ het er gmeint, wo si wider bi der Stadtmuur zrugg si gsi - dört het dr Ma uf ihns gwartet.

 

Am Abe zrugg uf em Fäud unger de Stärne bi de Schaaf het ‘s Eseli a de lieb Jesus dänkt, a die vile Bletter, a die vile Lüüt und a die vile ‘Hosannas’ –
was het das ächt aues bedütet?

Es het gschtuunt, dass es so starch isch gsi und dr Jesus het möge trage.

Es het gschpürt, dass es a däm Tag e wichtigi Uufgab erfüut het.

Dr Baahrnabas und dr Hung hei ganz nöch bim Eseli gschlofe und dr Ma het ‘s am Ohr gchräbelet und gmeint:

‘s chunnt guet, Eseli, ‘s chunnt guet’.

Und so het ‘s Eseli sini Zfrideheit, sini Uufgab und siini Familie gfunde.